बिज्ञापन

बिज्ञापन

यस वर्ष विभागले सडक व्यवस्थापनमा आधुनिक प्रविधिको प्रयोगलाई समेत प्राथमिकता दिएको छ। ‘सेतु’ नामक सफ्टवेयरमार्फत देशभर परिचालित २ सय ७७ वटा हेभी उपकरण र तिनका अपरेटरको वास्तविक समय (लाइभ) लोकेसन निगरानी गर्ने व्यवस्था गरिएको महानिर्देशक जैसीले जानकारी दिए। उनका अनुसार कुनै स्थानमा पहिरो वा सडक अवरोधको सूचना प्राप्त हुनेबित्तिकै सबैभन्दा नजिक रहेको उपकरण तत्काल परिचालन गर्न सकिने भएकाले उद्धार तथा सडक खुलाउने कार्य अझ प्रभावकारी हुने अपेक्षा गरिएको छ।

विभागले यान्त्रिक महाशाखा र सम्बन्धित सडक डिभिजन कार्यालयबीच समन्वय गरी जोखिमयुक्त क्षेत्रमा उपकरणहरू तयारी अवस्थामा राखेको जनाएको छ। यसबाट विपद्का बेला प्रतिक्रिया दिने समय घट्ने र यातायात सेवा छिटो पुनः सञ्चालन गर्न सहयोग पुग्ने विश्वास विभागको छ।

पहिरोको उच्च जोखिम भएका क्षेत्रहरूमा पनि विभागले पूर्वतयारीलाई तीव्र बनाएको छ। बजेट र स्रोतको सीमितताका कारण सबै जोखिमयुक्त स्थानमा स्थायी समाधान सम्भव नभए पनि नागढुङ्गा–मुग्लिङ, नारायणगढ–मुग्लिङ तथा कान्ति लोकपथका प्रमुख पहिरो क्षेत्रमा बायो–इन्जिनियरिङ, रक एङ्करिङ र सर्टक्रिटिङ प्रविधिमार्फत ढलान तथा पहिरो नियन्त्रणका काम सम्पन्न गरिएको छ।

झ्याप्ले खोला, महेश खोला र कृष्णभिरजस्ता विगतदेखि समस्या देखिएका पहिरो क्षेत्रलाई धेरै हदसम्म स्थिर बनाइएको विभागको दाबी छ। यस्तै नारायणगढ–मुग्लिङ सडकखण्डको तुइन खोला तथा कान्ति लोकपथका केही संवेदनशील स्थानमा पहिरो नियन्त्रणका काम अझै जारी रहेको विभागले जनाएको छ।

मनसुनका बेला यात्रुहरूले मौसम पूर्वानुमान र सडकको अवस्थाबारे जानकारी लिएर मात्र यात्रा गर्नुपर्नेमा विभागले जोड दिएको छ। अत्यावश्यक कामबाहेक प्रतिकूल मौसममा यात्रा नगर्न, सुरक्षा निकाय तथा सडक विभागका कर्मचारीको निर्देशन पालना गर्न र कुनै पनि विपद् वा सडक अवरोध देखिए विभागको हटलाइन, प्रहरी वा सम्बन्धित निकायलाई तत्काल जानकारी गराउन विभागले सर्वसाधारणसँग आग्रह गरेको छ।

निर्माणाधीन सडकमा सडक सञ्चालन र अवरोध व्यवस्थापनको जिम्मेवारी सम्बन्धित निर्माण व्यवसायीलाई दिइएको तथा अन्य सबै सडकमा विभागले चौबीसै घण्टा निगरानी र आवश्यक सेवा उपलब्ध गराउने प्रतिबद्धता जनाएको छ।